அதிக மதிப்பெண் பெற்ற மாணவ,மாணவிகள் மேல்நிலைக்கல்வி பயில நிதியுதவி பெற விண்ணப்பிக்கலாம்

10-ம் வகுப்பு பொதுத் தேர்வில் அரசுப் பள்ளிகளில் அதிக மதிப்பெண்கள் பெற்ற மாணவ, மாணவிகள் தமிழகத்தின் சிறந்த தனியார் பள்ளிகளில் சேர்ந்து மேல்நிலைக்கல்வி பயில நிதியுதவி பெறலாம்.

இதுகுறித்து மாவட்ட ஆட்சியர் வெளியிட்ட செய்திக்குறிப்பு:

மாவட்ட அரசுப் பள்ளிகளில் பயின்று 10-ம் வகுப்பு அரசு பொதுத் தேர்வில் அதிக மதிப்பெண் பெற்ற பிற்படுத்தப்பட்ட வகுப்பைச் சேர்ந்த 3 மாணவர்கள், 3 மாணவிகள் மற்றும் மிகவும் பிற்படுத்தப்பட்ட, சீர்மரபினர் வகுப்பைச் சேர்ந்த 2 மாணவர்கள், 2 மாணவிகள் என மொத்தம் 10 மாணவ, மாணவிகள் தொடர்ந்து 11-ம் வகுப்பை தமிழகத்தில் உள்ள தலைசிறந்த தனியார் மேல்நிலைப் பள்ளிகளில் சேர்ந்து பயில விரும்பும்பட்சத்தில், அரசால் நிதியுதவி வழங்கப்படுகிறது.

மாணவர் பெற்றோரது ஆண்டு வருமானம் ரூ. 1 லட்சத்திற்கு மிகாமல் இருக்க வேண்டும். ஒரு மாணவருக்கு அதிகபட்சமாக ஆண்டுக்கு கல்விக் கட்டணம் ரூ. 8,000-ம், பராமரிப்புக் கட்டணம் ரூ. 3,650-ம், விடுதிக் கட்டணம் ரூ. 15,000-ம், சிறப்பு பயிற்சிக் கட்டணம் ரூ. 1,500-ம் என மொத்தம் ரூ. 28,000 வீதம் 2 ஆண்டுகளுக்கு ரூ. 56,000 நிதியதவி வழங்கப்படுகிறது.

இத்தகுதியுடைய மாணவ, மாணவிகள் ஆட்சியர் அலுவலகத்தில் உள்ள மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலரைத் தொடர்பு கொள்ளலாம்.