இலவச மடிக்கணினி வழங்ககல்லூரி மாணவர்கள் கோரிக்கை

பெரம்பலூர் மாவட்டத்தில், மேல்நிலைப் பள்ளியில் தேர்ச்சி பெற்று இடைநின்று உயர்கல்வி கற்கும் கல்லூரி மாணவர்களுக்கு அரசின் இலவச மடிக்கணினி வழங்க நடவடிக்கை மேற்கொள்ள வேண்டுமென மாவட்ட ஆட்சியர் தரேஸ் அஹமதுவிடம் புதன்கிழமை மனு அளிக்கப்பட்டது.

இதுகுறித்து, குரும்பலூர் பாரதிதாசன் பல்கலைக்கழக உறுப்புக் கல்லூரி சமூகப் பணித் துறை மாணவ, மாணவிகள் அளித்த மனு:

பெரம்பலூர் அருகே உள்ள குரும்பலூர் பாரதிதாசன் பல்கலைக்கழக கல்லூரியில் சமூகப் பணித் துறையில் 2-ம் ஆண்டு கல்வி பயின்று வருகிறோம். கல்லூரியில் பயிலும் மாணவ, மாணவிகளுக்கு தமிழக அரசின் இலவச மடிக்கணினி வழங்கப்பட்டுள்ளது. ஆனால், பள்ளிப்படிப்பை முடித்து ஓராண்டு இடைநிறுத்தம் ஏற்பட்டதால், தற்போதைய கல்வியாண்டில் இலவச மடிக்கணினி வழங்கப்படவில்லை. எனவே, 100-க்கும் மேற்பட்ட இடைநின்ற மாணவர்களுக்கும் இலவச மடிக்கணினி வழங்க மாவட்ட நிர்வாகம் உரிய நடவடிக்கை மேற்கொள்ள வேண்டும்.

மனுவை பெற்றுக்கொண்ட மாவட்ட ஆட்சியர் தரேஸ் அகமது, உரிய நடவடிக்கை மேற்கொள்ளப்படும் என உறுதியளித்தார்.