அம்பேத்கார் சிலை உடைப்பை கண்டித்து வி.சி கட்சியினர் சாலை மறியல்

காரைக்கால்: அம்பேத்கார் சிலை உடைப்பை கண்டித்து, காரைக்காலில் விடுதலைச் சிறுத்தை கட்சியினர் இரு இடங்களில் சாலை மறியல் போராட்டம் நடத்தினர்.

புதுச்சேரி அபிஷேகம்பாக்கத்தில் டாக்டர் அம்பேத்கர் சிலையை அப்புறப்படுத்தியது மற்றும் உடைத்ததை கண்டித்து காரைக்கால் மாவட்ட விடுதலைச் சிறுத்தை கட்சியினர் காரைக்கால் பாரதியார் சாலை பேருந்து நிலையம் அருகில், திருநள்ளாறு ஆகிய இரு இடங்களில் நேற்று பகல் சாலை மறியல் செய்தனர்.

பேருந்து நிலையம் அருகில் நடைபெற்ற சாலை மறியல் போராட்டத்திற்கு, மாநில துணைப்பொது செயலர் அரசு வணங்காமுடி, மாநில செயலர் செந்தமிழ்செல்வன் உள்ளிட்ட பலர் கலந்துகொண்டனர். நகர போலீசார் சாலைமறியலை கைவிடும்படி கூறியும் சாலை மறியல் போராட்டத்தை தொடர்ந்ததால், வணங்காமுடி, செந்தமிழ்செல்வன் உள்ளிட்ட 120 பேரை போலீசார் கைது செய்தனர். அதேபோல், திருநள்ளாற்றில் நடைபெற்ற சாலை மறியலில் ஈடுபட்ட 60 பேரை திருநள்ளாறு போலீசார் கைது செய்தனர்.