அழகுக்கலை பயிற்சி பெற்றவர்களுக்கு சான்றிதழ்

பெரம்பலூர் இந்தியன் ஓவர்சீஸ் வங்கியின் சுயவேலைவாய்ப்பு பயிற்சி நிலையத்தில், கடந்த 30 நாள்கள் அழகுக் கலைப் பயிற்சி பெற்றவர்களுக்கு சான்றிதழ் வழங்கும் விழா சனிக்கிழமை நடைபெற்றது.

பெரம்பலூர் இந்தியன் ஓவர்சீஸ் வங்கிக் கிளை பொது மேலாளர் மோகனரங்கன் தலைமை வகித்தார். மாவட்ட முன்னோடி வங்கி மேலாளர் சி. சந்திரசேகரன், முதன்மை மேலாளர் ஆதிமூலம் ஆகியோர் முன்னிலை வகித்தனர். 

சிறப்பு விருந்தினராக பங்கேற்ற அஷ்வின் ஸ்வீட்ஸ் அண்ட் ரெஸ்டாரண்ட்ஸ் நிறுவன மேலாண்மை இயக்குநர் கே.ஆர்.வி. கணேசன் பயிற்சி பெற்ற மகளிருக்கு சான்றிதழ் அளித்தார்.

புதுவாழ்வு திட்ட அலுவலர் ப. சுதாதேவி பேசியது:

படித்து முடித்த பெண்கள் அரசு வேலையை மட்டுமே நம்பியிருக்காமல், சுயமாக தொழில் தொடங்கி தன்னம்பிக்கையோடு வாழ்வில் முன்னேற வேண்டும். பெண்கள் சமுதாயத்தில் முன்னேற வேண்டுமானால், தங்களது திறமைகளை வெளிப்படுத்த வேண்டும் என்றார் அவர்.

நிகழ்ச்சியில் சுயவேலைவாய்ப்பு பயிற்சி மைய இயக்குநர் ஜி. பார்த்தசாரதி, அஸ்வின்ஸ் நிறுவன மனிதவள மேம்பாட்டு அலுவலர் சத்தியமூர்த்தி, அழகுக்கலை பயிற்றுநர் திலகம் மற்றும் பெண்கள் உள்ளிட்ட பலர் பங்கேற்றனர்.